TIRANË, 27 shkurt /ATSH – I. Vata/ – Autoriteti shqiptar është përzgjedhur si organizator i edicionit të 41-të të Konferencës Ndërkombëtare të Komisionerëve të Mbrojtjes së të Dhënave dhe Privatësisë (ICDPPC), që do të zhvillohet në datat 21-24 tetor 2019 në Tiranë.
Komisionerit për të Drejtën e Informimit dhe Mbrojtjen e të Dhënave Personale, Besnik Dervishi, zhvilloi takimin e parë të Bordi Konsultativ Kombëtar i ICDPPC – Tirana 2019.
Në takim morën pjesë Erinda Ballanca, Avokate e Popullit, Robert Gajda, Komisioner për Mbrojtjen nga Diskriminimi, Spiro Brumbulli, Sekretar i Përgjithshëm i Shoqatës Shqiptare të Bankave, nga bota akademike Eralda Methasani Çani e Endri Xhina dhe Fotjon Kosta, Koordinator i Forumit Shqiptar të Qeverisjes së Internetit.
Po ashtu, anëtarët e Bordit u njohën me përgatitjet tekniko-organizative për këtë aktivitet, i cili është forumi më i madh dhe më i rëndësishëm i fushës në rang botëror.
Gjithashtu, të ftuarit shkëmbyen ide e mendime se ku duhet të fokusohet tematika e përmbajtjes së Konferencës Ndërkombëtare, si dhe përcaktuan modalitetet dhe afatet për këtë qëllim. /a.g/
