TIRANË, 23 janar /ATSH/ – Futbollisti holandez De Jong është edhe një hap më pranë transferimit në Camp Nou.
Agjenti i tij, Ali Dursun, u ka kthyer përgjigje negative “PSG-së” dhe “Manchester City-t”, klube që gjithashtu janë interesuar seriozisht për të siguruar shërbimet e 21-vjeçarit.
“Faleminderit për interesimin por ai shkon tek ‘Barcelona’”, ka qenë mesazhi i Dursun.
“El Mundo Deportivo”, gazetë e afërt me klubin katalanas, zbulon se një delegacion i kryesuar nga vetë presidenti Josep Maria Bartomeu, është nisur drejt Amsterdamit pak ditë më parë, duke bindur futbollistin t’i bashkohej “Barçës”, ndonëse ai ishte pranë nënshkrimit me “PSG”.
De Jong është bindur t’i thoshte përfundimisht “po” “Barcelonës” nga stili i lojës së “blaugranave”, që u përshtatet shumë karakteristikave të tij.
Ajaxi nuk heq dorë nga kërkesa prej 75 milionë eurosh për një talent që majin e ardhshëm do të mbushë 22-vjeç.
Zyrtarizimi mund të vijë shumë shpejt, kështu që në “Camp Nou” kanë nisur përgatitjet për të pritur një yll në ngjitje të futbollit holandez.
/gj.m/ /a.g/
