TIRANË, 17 janar /ATSH/ – Kryeministri Edi Rama dhe Komisioneri për Politikat Europiane të Fqinjësisë dhe Negociatat e Zgjerimit, Johannes Hahn do të zhvillojnë sot një takim për të shqyrtuar përpjekjet për reformat.
“Ky takim vjen në një moment kur është me rëndësi të madhe vijimi me vendosmëri i ecurisë së reformave, të cilat janë të nevojshme për të ecur përpara drejt rrugës së Bashkimit Europian”, thuhet në një njoftim për shtyp të Komisionit Europian.
Lajmin e ka bërë të ditur edhe Ambasadori i Bashkimit Europian, Luigi Soreca ku deklaron se “Komisioneri Johannes Hahn do të takohet më vonë sot me Kryeministrin Edi Rama për të vlerësuar së bashku gjendjen e përpjekjeve të vazhdueshme të reformave, të cilat duhet të ndiqen me vendosmëri në muajt e ardhshëm.”
Komisioneri për Politikat Europiane të Fqinjësisë dhe Negociatat e Zgjerimit, Johannes Hahn do të vizitojë sot edhe Kosovën, ku do të pritet nga Kryeministri Ramush Haradinaj.
/gj.mima/ /a.g/
