TIRANË, 15 janar/ATSH/- Në bashkinë e Gjirokastrës po vazhdon puna për pastrimin e dëborës në rrugët e qytetit, si dhe furnizimi me dru i institucioneve arsimore.
“Temperaturat e ulëta vazhdojnë të jenë të pranishme ende në Gjirokastër. Grupet tona të punës po vazhdojnë ndërhyrjen në çdo sokak dhe rrugicë ku ka vështirësi në lëvizjen e mjeteve dhe qytetarëve”, bën të ditur bashkia e Gjirokastrës.
Gjatë këtyre ditëve bashkia ka punuar për hapjen e të gjitha rrugëve nëpër shkolla, si dhe për furnizimin me dru të institucioneve arsimore për sigurimin e kushteve për një mësim sa më cilësor.
Po ashtu punonjësit e bashkisë po punojnë për pastrimin e territorit nga degët e rrëzuara për shkak të dëborës.
Grupet e punës janë shpërndarë në të gjitha rrugët dytësore për eliminimin e ngricave dhe hedhjen e kripës dhe skorjes. /k.s/ /a.g/
