TIRANË, 10 janar /ATSH/ – Gjatë ditës së sotme, institucioni i prefektit të qarkut Gjirokastër, në cilësinë e drejtuesit të KPPECK, ka ndjekur dhe monitoruar nga afër situatën emergjente të krijuar gjatë këtyre ditëve në të gjithë territorin e qarkut.
Si pasojë e angazhimit të institucioneve vendore dhe degëve territoriale, është bërë e mundur ndërhyrja në disa rrugë të brendshme të qytetit të Gjirokastrës dhe Libohovës.
Aktualisht me angazhimin konkret të ARRSH është bërë e mundur hapja e segmenteve rrugore Ura e Kardhiqit – Kardhiq – Kakodhiq, segmenti rrugor Postbllok – sheshi “Cerciz Topulli”, segmenti rruga nacionale – Zinxhira, unaza e qytetit – lagjja “Granica” – kalceto – rruga nacionale.
Ngelen problematike rrugët e njësive administrative Picar, Cepo, Zagorie, Kurvelesh dhe Frashër për të cilat parashikohet një ndërhyrje nga ana e këtyre njësive për orët në vazhdim.
Për njësitë vendore ngelet si detyrë angazhimi maksimal për ndërhyrjen e menjëhershme në këto zona dhe në pamundësi të ndërhyrjes t’i drejtohen institucionit të prefektit të qarkut Gjirokastër dhe nëpërmjet tij, Drejtorisë së Përgjithshme të Emergjencave Civile me qëllim eliminimin e rasteve emergjente dhe ardhjen në ndihmë të personave të prekur nga këto situata. /a.a/ /a.g/
