TIRANË, 29 nëntor /ATSH/ – Seria A, e ka rifituar vëmendjen e humbur gjatë viteve të fundit. Ajo matet nga numri i tifozëve që shkojnë për të ndjekur skuadrën në stadium.
Në javën e fundit janë regjistruar 300 mijë tifozë në stadiumet italiane, që do të thotë një mesatare prej 30.295 tifozë për ndeshje.
Kjo shifër është rekord, pasi nuk arrihej që prej vitit 2010. Ndërsa mesatarja e tifozëve për ndeshje deri më tani në këtë sezon është 25.448, duke pasur një rritje nga viti i kaluar që ishte 24.634.
Këtë vit numri i tifozëve që ndjekin ekipet në stadium ka ardhur duke u rritur dhe kjo për shkak të konkurrencës së madhe që ka filluar të jetë e pranishme në këtë kampionat.
“Juventusi” është përforcuar në merkaton e fundit me Kristiano Ronaldon, i cili ka pasur ndikimin e tij. Nga ana tjetër “Interi”, “Napoli” e “Milani” janë përforcuar ndjeshëm për të krijuar një konkurrencë të fortë në këtë kampionat. /o.l/e.caushi/
