https://www.facebook.com/edirama.al/videos/2232858953647474/
TIRANË, 24 nëntor/ATSH-Maela Marini/ Flota e re e makinave të Policisë së Shtetit, e cila u prezantua sot në sheshin “Nënë Tereza” në Tiranë, dëshmon transformimin e mënyrës së funksionimit të gjithë procesit për garantimin e mbështetjes logjistike të Policisë së Shtetit.
Kështu deklaroi sot Kryeministri Edi Rama në prezantimin e kësaj flote, ndërsa solli fillimisht në vëmendje situatën në të cilën gjendej Policia e Shtetit para vitit 2013.
“M’u kujtua një raporti i vitit 2010 në media për 5 makina të sapo blera të Policisë së Shtetit që kishin mbetur në rrugë. 3 prej tyre, të sjella pas një tenderi prej miliona eurosh, kishin hapur kofanon te hyrja në Zogun e Zi për probleme me tubin e ujit dhe dy të tjera kishin mbetur te kthesa e Rinasit dhe u desh të rimorkioheshin”, tha Rama.
Ky episod spektakolar, sipas Ramës, nxjerr në pah një vazhdimësi të mbrapsht të procedurave për Policinë e Shtetit, e cila u bë edhe objekt komedish dhe përqeshjesh shumë shpesh, për shkak të keqpajisjes me mjete apo me uniforma.
Duke u ndalur te flota e re e makinave, Rama tha se “kjo është flota e parë e siguruar me një kontratë ndryshe, 4-vjeçare, në bazë të së cilës të gjitha mjetet do të zëvendësohen me të reja pas 4 vjetësh, duke shmangur historitë dhe tenderat e pafundëm të së shkuarës”.
“Ne shmangim imazhin qesharak të një Policie Shteti, që kishte një lloj-lloj makinash, me lloj-lloj problemesh, një karneval me trupën që reflekton dinjitetin dhe seriozitetin e një shteti”, tha Rama.
Kjo metodë e garantimit të logjistikës, sipas Kryeministrit, përdoret gjerësisht në vendet e zhvilluara dhe garanton shumë më tepër automjete se sa me tenderat. “Automjetet janë gjithmonë në gjendje funksionale dhe shërbimi i përgjigjet në vijimësi çdo difekti dhe i zëvendëson makinat në kohë reale, në rast se ato kanë një problem”, tha Rama. /a.g/
