TIRANË, 17 tetor/ATSH-Maela Marini/ Reformat e nxitjes së punësimit janë çelësi i suksesit në luftën kundër varfërisë.
Kështu deklaroi sot zv/kryeministrja Senida Mesi e pranishme në konferencën e organizuar sot në Tiranë, në kuadër të Ditës Botërore kundër Varfërisë.
Qeveria, tha Mesi, është e angazhuar duke nxitur sipërmarrjen dhe duke krijuar klimën e domosdoshme që biznesi të rritet, sepse janë ata që krijojnë punësimin dhe ndikojnë në rritjen ekonomike.
Zv/kryeministrja veçoi dy reforma të rëndësishme të ndërmarra nga qeveria shqiptare, si Rilindja Urbane dhe Reforma në Drejtësi, që kanë pasur ndikim në politikat për reduktimin e varfërisë në vend.
Rilindja Urbane dhe programi “100 fshatrat” patën ndikim në zhvillimin rajonal, ndërsa Reforma në Drejtësi është një parakusht edhe për nxitjen e investimeve të huaja direkte, por edhe të investimeve të brendshme”, – tha Mesi.
Duke u ndalur te reformat e qeverisë në luftën kundër varfërisë, Mesi veçoi reformën në skemën e ndihmës ekonomike dhe përfshirjen sociale. “Ne synojmë rritjen e eficiencës dhe përdorimit maksimal të fondeve në dispozicion, ku në këtë skemë të re të përfitojnë të varfërit e vërtetë, duke minimizuar abuzimet. Por, synimi i qeverisë është dalja nga varfëria përmes punës”, – tha Mesi.
Punësimi në vend të ndihmës ekonomike, sipas saj, është objektiv i qartë i qeverisë.
Mesi solli në vëmendje shifrat e INSTAT, sipas së cilave “në vitin 2015 papunësia ishte në nivelin 17.3 %, ndërkohë që në tremujorin e parë të këtij viti është në nivelin 12.5 %”.
Sfidë për ne, tha ajo, mbetet punësimi i të rinjve dhe moslargimi i tyre nga vendi. “Për këtë, përgjigja jonë është trajnimi profesional”, – tha Mesi. j.p/
