TIRANË, 26 shtator/ATSH/- Ndërmarrja e Ujësjellës-Kanalizimeve Vlorë është e vendosur për formalizimin e të gjithë abonentëve të qytetit bregdetar.
Gjatë aksioneve të ndërmarra ditët e fundit ka vijuar ndërprerjen e ujit të pijshëm për debitorët në disa lagje të qytetit si në lagjen “28 Nëntori”, në zonën e ish-Gjyqit të Vjetër, në zonën e Skelës etj.
“Ne kemi vendosur të ndërpresim ujin e pijshëm për të gjithë konsumatorët që nuk paguajnë, në mënyrë që të çojmë deri në fund reformën e ujit”, bën të ditur Ndërmarrja e Ujësjellës Kanalizimeve Vlorë.
Reforma e ujit po vijon me ritme në të gjithë qytetin e Vlorës. Përveç ndërprerjeve të ujit të pijshëm për debitorët, punonjësit e kësaj ndërmarrjeje kanë realizuar edhe kontakte me abonentët në lagjet e qytetit, të cilët i kanë njoftuar nëse janë debitorë./k.s/j.p/
