PRISHTINË, 9 korrik/ATSH/- Ministri i Infrastrukturës, Pal Lekaj bëri të ditur sot se për shkak të reshjeve të shiut që kanë përfshirë një pjesë të Kosovës, si pasojë e përmbytjeve të ujit është bllokuar rruga Prishtinë-Ferizaj, në Bibaj të Ferizajt.
“Rrebeshi i shiut që e përfshiu një pjesë të Kosovës para disa minutash ka bërë që rruga Prishtinë-Ferizaj në Bibaj të Ferizajt të bllokohet nga vërshimet e ujit. Sipas informacioneve të para kjo ka ndodhë si pasojë e mbylljes së vijave kulluese të brezit rrugor dhe prandaj kemi patur grumbullim të sasisë së ujit”, shkruan Lekaj në Facebook.
Sipas tij, kompania e mirëmbajtjes që është e përzgjedhur për këtë pjesë, është në vendin e ngjarjes dhe po ndërhyhet për të pastruar zonën e përmbytur.
Ministri Lekaj i bën thirrje të gjitha bizneseve që të respektojnë rregullat e mbrojtjes së brezit rrugor, në të kundërt inspektoriati i Ministrisë së Infrastrukturës do të udhëzohet të dalë në teren për të bërë kontrolle./KosovaPress/k.s/j.p/
