PRISHTINË, 2 korrik/ATSH/.- Me rastin e 28 vjetorit të deklaratës së 2 Korrikut 1990, kryetari i Kuvendit të Kosovës, Kadri Veseli, priti në takim delegatët e Kuvendit të Kosovës, nënshkrues të kësaj deklarate.
Kryeparlamentari Veseli uroi delegatët për këtë ditë të rëndësishme, ndërsa vlerësoi kontributin e tyre në kohë dhe rrethana të vështira.
“Akti juaj madhor i parapriu proceseve të tjera të rëndësishme në vitet në vijim: rezistencës paqësore dhe luftës së armatosur të Ushtrisë Çlirimtare të Kosovës, që kulmoi me çlirimin e Kosovës dhe vite më vonë me shpalljen e pavarësisë së saj”, theksoi Veseli.
Udhëheqësi i delegacionit të delegatëve, Iljaz Ramajli, falënderoi Veselin për pritjen tashmë tradicionale për ish-ligjvënësit e Kosovës, duke dhënë kështu mesazhin e përkujdesjes dhe vlerësimit të kontributit të brezave për lirinë dhe pavarësinë e Kosovës./KosovaPress/k.s/
