TIRANË, 15 Maj/ATSH/ – Presidenti francez, Emmanuel Macron do të presë sot në një takim zyrtar në Pallatin Elysee kryeministrin Edi Rama.
Në faqen e saj zyrtare, Presidenca franceze publikoi axhendën e takimeve të Presidentit Macron, ku konfirmohet zyrtarisht takimi me kryeministrin Edi Rama.
Takimi mes Kryeministrit Rama dhe Presidentit Macron do të jetë mjaft i rëndësishëm për vendin tonë, pasi në tryezën e bisedimeve do të jetë qëndrimi i Francës në lidhje me procesin e integrimit të Shqipërisë, e cila është në pritje të një vendimi nga ana e vendeve të BE-së në muajin qershor për hapjen e negociatave.
Takimet që po zhvillon kreu i qeverisë Rama, janë një shenjë pozitive për mbështetjen që vendi ynë po merr për hapjen e negociatave me Bashkimin Europian.
Pritja e Presidentit të Francës Emmanuel Macron vjen pas takimit që Kryeministri Rama zhvilloi 2 javë më parë me Kancelaren Angela Merkel.
/m.m/
