TIRANE,16 Mars/ATSH/ – Artisti Viktor Ferraj përmes figurës mitologjike “Centaur” sjell për publikun ndërthurjen e njeriut të kohëve moderne me teknologjinë, në ekspozitën e tij me po të njejtin emër.
Ekspozita ”Centaur” e çelur për publikun në galerinë e artit FAB, vjen e kuruar nga Petraq Papa dhe ekspozon për herë të parë punimet në qeramikë dhe tablo pikture për artdashësit që pëlqejnë artin e pikturës.
Përmes punimeve në skulpturë dhe pikturë artisti e fton publikun të reflektojë mbi shpirtin, duke risjellë në kujtesë faktin se në botën antike ky lloj bashkimi mes njeriut edhe kafshës shprehte vitalitetin, forcën dhe energjinë, që natyra i jepte atij dhe ai ndihej pjesë e saj.
Në fytyrat e personazheve dhe objekteve që artisti ka krijuar, dallohet dhe rikthimi i centaurëve të rinj. Centauri vjen këtë herë pa trup kali apo rrota motorri, por si një krijesë e përzier në kërkim të një harmonie të re.
Artisti Ferraj me ekspozitën personale sjell punët e tij, përmes gërshetimit dhe ndjesisë së tij artistike, punime që publiku do ti gjejë në galerinë FAB deri më 19 mars./a.a/ /a.g/
