TIRANË, 15 tetor/ATSH/ Në Gjirokastër u prezantuan projektet e reja të financuara nga Bashkimi Evropian, që mbështesin bashkitë shqiptare në procesin e pranimit në BE.
Gjirokastra si një qytet i përbotshëm dhe një markë e rëndësishme e trashëgimisë kulturore dhe turizmit, u zgjodh qyteti organizator i konferencës “Bashkitë shqiptare dhe procesi i integrimit në BE”.
Sipas ambasadorit Soreca, BE-ja po i kushton gjithnjë e më shumë vëmendje dhe po rrit asistencën për qeverisjen vendore në Shqipëri, ndërsa Shqipëria po përparon drejt pranimit në BE.
“Suksesi i këtyre aktiviteteve do të varet si nga zbatuesit ashtu edhe nga kontributi pozitiv i të gjithë aktorëve”, u shpreh ambasadori Soreca.
Kryetari i bashkisë së Gjirokastrës, Flamur Golemi theksoi se “bashkitë janë në një proces të rëndësishëm dhe të vazhdueshëm për të përmirësuar qeverisjen lokale, për të rritur standardet e shërbimeve për banorët dhe për të investuar në mënyrë që qytetarët të shohin të ardhmen e tyre këtu, në vendin tonë”.
Sipas tij, tre projektet “Bashkitë për në Evropë”, “BE për bashkitë” dhe “STAR 3-Mbështetja dhe avancimi i reformave të qeverisjes vendore” janë një mundësi më shumë për qeverisjen lokale, një ndihmë e madhe për zhvillimin e ekonomisë si dhe për të çuar përpara procesin e decentralizimit dhe të demokracisë lokale.
Kryebashkiaku Golemi u shpreh se “e çmoj shumë ndihmesën e jashtëzakonshme të ambasadorit Luigi Soreca, për t’i çuar përpara këto projekte, duke dëshmuar se mbetet një mik i madh i Shqipërisë dhe avokat i palëkundur i integrimit tonë në Bashkimin Evropian”.
Projektet që do të mbështeten financiarisht nga BE-ja janë “Bashkitë për në Europë”, “BE për bashkitë” dhe “STAR 3-Mbështetja dhe avancimi i reformave të qeverisjes vendore”.
/k.s/a.a/r.e/
