ROMË, 13 shtator /ATSH-ANSA/ – Situata në Afganistan tregon se kërcënimi i ekstremizmit në rritje qëndron ende dhe kërkon një përgjigje të koordinuar konkrete ndërkombëtare, deklaroi ministri i Jashtëm italian, Luigi Di Maio.
”Italia është e angazhuar në një koordinim të tillë me të gjithë partnerët duke i propozuar G20 një platformë gjithëpërfshirëse për dialog mbi dosjen afgane”, shtoi ai.
”Përparësia jonë duhet të jetë vazhdimi i garantimit të ndihmës për afganët, veçanërisht në aspektin e të drejtave dhe lirive të njeriut”, shtoi Di Maio.
Një konferencë donatorësh e organizuar nga OKB-ja për Afganistanin po zhvillohet sot, më pak se një muaj pasi talebanët morën pushtetin në vend, duke u përballur me një krizë humanitare në rritje.
Afganët do të kenë nevojë për rreth 606 milionë dollarë deri në dhjetor, sipas llogaritjeve të OKB-së.
Ndërsa shumë vende janë të gatshme të japin ndihmë humanitare, shumë janë të shqetësuara se si do të shpenzohen paratë, pasi talebanët tani kanë kontrollin e vendit dhe thonë se donacionet duhet të shoqërohen me kushte./ /os/
