UASHINGTON, 21 mars /ATSH-DPA/ – Presidenti i SHBA Joe Biden do të presë homologun e tij të Koresë së Jugut Moon Jae In në Shtëpinë e Bardhë për bisedimet e dominuara nga kërcënimi bërthamor i Koresë së Veriut.
Eshtë hera e dytë që një udhëheqës i huaj viziton Uashingtonin, që kur Biden mori detyrën në janar.
Në prill, Biden priti kryeministrin japonez Yoshihide Suga, një tjetër aleat kryesor për Uashingtonin në Azinë Lindore.
Moon është në vitin e tij të fundit në detyrë dhe mundësia e tij për të ndjekur paqen me Veriun po mbaron.
Regjimi i Koresë së Veriut provoi raketat me rreze të shkurtër veprimi në mars.
Ajo u pa si një sfidë për administratën e re të Biden dhe e shtyu Phenianin drejt një prej çështjeve më të ngutshme të politikës së jashtme të presidentit.
Sekretari i Shtetit i SHBA Antony Blinken dhe shefi i Pentagonit Lloyd Austin udhëtuan në Seul muajt e fundit si pjesë e përpjekjeve të Uashingtonit për të koordinuar strategjinë me jugun.
Biden premtoi përgjigje në rast të përshkallëzimit të Koresë së Veriut, por nuk ofroi një përshkrim të hollësishëm të qasjes së tij përtej përpjekjeve për të vazhduar bisedimet me Korenë e Veriut. /os/
