TIRANË, 9 korrik/ATSH/- Në Maminas është ndërtuar një qendër e re shëndetësore, si një model i qendrave të kujdesit parësor, për nga infrastruktura dhe shërbimi që ofron.
Kështu e ka cilësuar këtë të fundit, ministrja e Shëndetësisë, Ogerta Manastirliu, duke sjellë në vëmendje se rezultate të tilla pozitive vijnë si pasojë e bashkëpunimit me bashkitë dhe biznesin.
“Është ndër qendrat më të mira të Shërbimit Parësor dhe është një shembull i mirë se si bashkëpunimi i Ministrisë së Shëndetësisë me pushtetin vendor dhe biznesin, mund të sjellin rezultate të tilla në shërbim të komunitetit”, – u shpreh Ministrja, gjatë vizitës në qendrën e re të Maminasit në Durrës.
Duke shprehur angazhimin e Qeverisë për përmirësimin rrënjësor të infrastrukturës në shërbimin shëndetësor parësor, ajo tha se ka nisur puna për rindërtimin e 80 qendrave shëndetësore në të gjithë vendin.
“Vetëm në qarkun e Durrësit rehabilitohen 6 qendra shëndetësore këtë vit, në kuadër të programit kombëtar për rindërtimin e 300 qendrave shëndetësore në 4 vite, 80 prej të cilave rindërtohen këtë vit”, – tha Manastirliu.
Në qarkun e Durrësit këtë vit do të rikonstruktohen Qendra Shëndetësore nr. 5, Qendra Shëndetësore nr. 6 në plazh, pika e ambulancës në Porto-Romano, pika e ambulancës në Shetaj (Ishëm), Qendra Shëndetësore Shënavlash (Rrashbull) dhe Qendra Shëndetësore Derede në Krujë. Brenda vitit përfundon rindërtimi i 80 qendrave shëndetësore në të gjithë vendin. /z.tosku//m.m/
