TIRANË, 14 gusht/ATSH/ Ministrja e Mbrojtjes, Olta Xhaçka mbërriti në Kakavijë, ku u takua me kryebashkiakët e Gjirokastrës dhe Dropullit, prefektin dhe drejtuesit e Policisë së qarkut.
Ministrja Xhaçka dhe drejtori i Agjencisë Kombëtare të Mbrojtjes Civile, Haki Çako, ndodhen në pikën kufitare të Kakavijës, pas fluksit të shtuar të qytetarëve në pikat e kalimit kufitar.
Ndërkohë efektivë të Batalionit të Mbështetjes Rajonale të FA në Gjirokastër dhe një automjet i posaçëm me 10 mijë litra ujë si dhe ekipe mjekësore po u vijnë në ndihmë qytetarëve të bllokuar.
Në Kakavijë dhe Kapshticë u krijuan radhë të gjata pritje të qytetarëve dhe automjeteve për të kaluar në Greqi, pas vendimit të autoriteteve greke për të kërkuar vetizolim 7-ditor nga data 17 gusht dhe certifikatë të testit negativ për të gjithë shtetasit që kalojnë nga Shqipëria në Greqi.
Shkak i radhëve në kufi u bë edhe orari i kufizuar nga pala greke në pikën kufitare të Kakavijës dhe atë të Kapshticës./m.m//r.e/
