TIRANË, 16 nëntor/ATSH/Ministria e Arsimit për 2020 do të vijojë mbështetjen financiare përmes investimeve në sport, për ndërtimin dhe rindërtimin e objekteve sportive, pajisje me bazë materiale të tyre në funksion të ekipeve kombëtare.
“Zhvillimi i programeve trajnuese në sistemin sportiv kombëtar në funksion të rritjes së kapaciteteve në fushën e sportit, trajnime çdo vit për 20-25% e stafet teknike të sistemit sportiv kombëtar (732 teknikë – trajnerë, specialistë, instruktorë, mjekë etj, ku përparësi kanë sportistët dhe trajnerët femra)”, -thuhet në relacionin e projektbuxhetit për vitin e ardhshëm.
Ndërkaq, p/buxheti i 2020 parashikon rritjen e mbështetjes financiare për shpërblimin e sportistëve elitar, fitues në aktivitete ndërkombëtare, mbështetje financiare për 20-25 sportistë elitarë në vit, si dhe mbështetje financiare për aktivitete sportive promovuese dhe garuese në institucionet arsimore të arsimit parauniversitar dhe universitar.
