TIRANË, 2 Gusht /ATSH/ -Kryebashkiakja e re e Urës Vajgurore, Juliana Memaj është betuar në ambientet bashkisë gjatë mbledhjes së parë të këshillit bashkiak për mandatin 2019-2023.
Të pranishëm në këtë ceremoni ishin ministri i Turizmit, Blendi Klosi, prefektja e qarkut të Beratit Valbona Zylyftari dhe zëvendës ministri i Brendshëm, Julian Hodaj.
Ky këshill ka në përbërje 21 këshilltarë, nga ku 15 janë të PS, dhe 6 nga partitë e vogla. Kryetari i këshillit bashkiak u zgjodh unanimisht Hysen Hoxha.
Në fjalën e saj kryebashkiakja e re në detyrë deklaroi se e presin shumë sfida.
“Ajo që kemi qëllim të përbashkët është që do të bëjmë të mundur transformimin e Urës Vajgurore. Pasi mandatin e parë kishim synim ta nxirrnim nga emergjencat që e kishin ndjekur prej vitesh këtë bashki. Sot nëpërmjet transformimit , duke pasur si qëllim të vetëm rritjen e mirëqenies së banorëve të këtij komuniteti dhe amplifikimin e identitetit të tij si një portë hyrëse në qarkun e Berati ne së bashku do të bëjmë më të mirën për këtë komunitet”, tha Memaj.
I gjithë procesi i konstituimit u zhvillua i qetë dhe pa asnjë incident.
Memaj rezultoi fituese në zgjedhjet e 30 qershorit dhe e drejton këtë bashki për mandatin e dytë radhazi.
/gj.mima/
