TIRANË, 11 prill/ATSH/- Njësia Administrative Guri i Zi ishte ndalesa e radhës e fushatës sensibilizuese kundër kultivimit të bimëve narkotike, e ndërmarrë nga bashkia e Shkodrës.
Ndryshe nga takimet e tjera, përveç përfaqësueseve të Policisë së Shtetit, administratorit dhe kryetarëve të fshatrave, ishin të pranishëm mësues të shkollës “At Gjon Karma” dhe nxënës të saj.
Duke përfituar nga prania e tyre, nënkryetari i bashkisë Shkodër Arben Gjuraj, ka përcjellë mesazhin që pikërisht nxënësit të bëhen përhapës të mesazhit kundër kultivimit të bimëve narkotike, duke filluar nga familjet e tyre dhe komunitetet ku jetojnë.
Gjatë takimit u diskutua për nevojën e bashkëpunimit të ngushtë mes qeverisjes vendore në territor dhe Policisë së Shtetit, ndërgjegjësimin derë më derë të banorëve për rrezikshmërinë e aktivitetit të jashtëligjshëm të kultivimit të bimëve narkotike, penalitetet që parashikon ligji dhe impaktin negativ që kanë bimët narkotike tek përdoruesit, veçanërisht të rinjtë. /k.s/j.p/
