TIRANË, 13 janar/ATSH-Maela Marini/ Kryeministri Edi Rama vlerësoi sot se nisja e madhe e “Giro D’Italia” në Shqipëri është edhe një tjetër shtysë e veçantë për rritjen e mëtejshme të industrisë sonë të turizmit, ndërsa solli në vëmendje se Shqipëria do të ekspozohet në sytë e 800 milionë teleshikuesve.
Në një videomesazh pak para nisjes në Romë, për prezantimin publik të “Giro d’Italia”, Kryeministri u ndal te rëndësia e këtij aktiviteti sportiv për vendin tonë.
Ndërsa e cilësoi si një ndër ngjarjet më të mëdha vjetore të sportit, e cila transmetohet nga 200 televizione të botës, Rama theksoi se “këtë vit Shqipëria është zgjedhur si vendi i Nisjes së Madhe (La Grande Partenza), ku do të zhvillohen tri etapat e para”.
“Për tri ditë rresht bukuritë e vendit tonë, Durrësi e Kruja me historinë e me peizazhet e tyre të mrekullueshme; Tirana me zhvillimin e saj mbresëlënës; Vlora me luginën e lumit të saj, me majën e Llogorasë, me ujërat e Jonit dhe të Adriatikut, do të ekspozohen në sytë e 800 milionë teleshikuesve. Pa llogaritur dhjetëra-mijëra tifozë të çiklizimit që do të vijnë në Shqipëri për të ndjekur nga afër idhujt e tyre”, u shpreh Rama.
Kjo ngjarje e madhe sportive ku kandidatura e Shqipërisë u përzgjodh për edicionin e Xhiros së këtij viti, sipas Kryeministrit Rama “është një tjetër pasqyrë kuptimplotë e rritjes së popullaritetit ndërkombëtar të vendit tonë”.
Rama theksoi se “deri para disa vitesh të tilla ngjarje dhe zhvillime as mund të imagjinoheshin”.
‘Nisja e Madhe e Giro D’Italia në Shqipëri është edhe një tjetër shtysë e veçantë për rritjen e mëtejshme të industrisë sonë të turizmit, që është një industri e re, por që sapo e mbylli vitin e shkuar me thuajse 12 milionë turistë. Shqipëria po bëhet dita-ditës dhe ngjitja e saj drejt majës së 2030-ës në BE vazhdon përditë, e pandërprerë dhe e pandalshme”, u shpreh Rama.
/j.p//r.e/
