PRISHTINË, 30 dhjetor/ATSH/ Ministrja e Drejtësisë, Albulena Haxhiu edhe sot ka ritheksuar se kryeministri i Kosovës, Albin Kurti nuk e ka refuzuar dëshminë e tij. Por, ka propozuar data, ditë dhe orë për Prokurorinë Speciale për ta marrë në pyetje në zyrën e tij.
Haxhiu në një konferencë për medie, ku prezantoi punën e saj përgjatë vitit 2024 tha se kryeministri i Kosovës, Albin Kurti nuk është i korruptuar.
“Në qeveritë e kaluara ka lulëzuar korrupsioni dhe e dini shumë mirë, këtu kemi qenë këtu jemi e dimë ku kanë qenë dhe si janë pasuruar, kush është marr me ata. Askush nuk mund të thotë sot se kryeministri, Kurti është i korruptuar, askush madje as ata që po na luftojnë neve, as ata nuk thonë se kryeministri, Kurti është i korruptuar kjo dihet botërisht. Por, ama në të kaluarën përmes korrupsionit janë pasuruar, janë bërë milionerë veç duke qenë politikanë, veç duke qenë ministër e kryeministër apo ndonjë pozicion tjetër dhe askush nuk është marr me pasurinë e paligjshme…Kryeministri Kurti nuk e ka refuzuar dëshminë ai i ka propozuar disa data, disa ditë, disa orë Prokurorisë Speciale për të u marrë në pyetje në zyrën e tij”, thotë ajo.
Ministrja Haxhiu tha se nuk kanë hequr dorë nga reforma në sistemin e drejtësisë, por atë po e zhvillojnë në dy nivele.
/Kosovapress/
