TIRANË, 23 dhjetor/ATSH/ Moti i keq ka përfshirë të gjithë vendin prej mëngjesit të sotëm, duke shkaktuar vështirësi në lëvizjen e mjeteve si dhe në furnizimin me energji elektrike të disa zonave, kryesisht në veri dhe juglindje.
Operatori i Sistemit të Shpërndarjes, (OSSH) bën të ditur se grupet e punës janë në terren për të siguruar riparimin e çdo avarie të shkaktuar nga era e fortë dhe reshjet.
OSSH bën të ditur se linjat e tensionit të lartë 35kV dhe nënstacionet janë në kushte optimale, përfshi edhe rrjetin që furnizon hidrovorët.
“Kushtet e motit, sidomos në zonat me prezencë të theksuar të dëborës kanë sjellë ndikime në rrjetin elektrik, ndaj Operatori i Sistemit të Shpërndarjes (OSSH) ka angazhuar të gjitha strukturat e terrenit për zgjidhjen e problemeve të furnizimit me energji elektrike. Koha e riparimit të avarive ishte brenda kushteve të lejuara nga moti. Linjat e tensionit të lartë 35kV dhe nënstacionet janë në kushte optimale, përfshi edhe rrjetin që furnizon hidrovorët”, deklaron OSSH.
/a.f/
