TIRANË, 4 nëntor/ATSH/ Pas triumfit që pati në Festivalin Ndërkombëtar të Teatrove MESS, trupa e Teatrit “Migjeni” të Shkodrës, u prit nga kryebashkiaku Benet Beci.
Takimi u zhvillua në mjediset e bashkisë, ku ishte i pranishëm një pjesë e kastit të mrekullueshëm të dramës “Vizita”.
Benet Beci shkroi në rrjetet sociale se, ishte një kënaqësi e veçantë të mirëpriste aktorët e shfaqjes teatrale “Vizita”.
Mbështetur në kryeveprën e H.G. Wells “Vizita e mrekullueshme” dhe me regji të Davide Iodice, vepra u soll për herë të parë në skenë nga trupa e Teatrit “Migjeni”, me një kast të mrekullueshëm artistësh si: Rita Gjeka Kacarosi, Pjerin Vlashi, Jozef Shiroka, Fritz Selmani, Julinda Emiri, Nikolin Ferketa, Aleksandër Prenga, Vladimir Doda, Merita Smaja e Raimonda Marku.
Shqipëria për herë të parë mori pjesë në Festivalin Ndërkombëtar të Teatrove, MESS, Sarajevë, duke u vlerësuar me një nga çmimet më të rëndësishme, atë të medias. Kryebashkiaku Beci e ka vlerësuar këtë si një moment historik për Teatrin “Migjeni” dhe për qytetin e Shkodrës.
/j.p/
