TIRANË, 14 tetor/ATSH/ Në urën e Bilçës në Berat ka filluar vendosja e trarëve në dy anët e saj.
Kryetari i bashkisë së Beratit, Ervin Demo tha sot se “punimet në urë po ecin sipas parashikimeve, ku pas vendosjes së trarëve, fillon puna për mbistrukturën e urës”.
Demo theksoi se me investimet që po kryhen, Berati po ndryshon në strukturën e vet dhe është tashmë një pol zhvillimi për gjithë rajonin.
Banorët e zonës e kanë pritur ndërtimin e kësaj ure për më shumë se 30 vite.
Ndërtimi i urës është projekti i bashkisë Berat dhe po realizohet falë partneritetit me Fondin Shqiptar për Zhvillim dhe financimit me grant nga fondet e Bashkimit Evropian nëpërmjet Bankës Evropiane për Zhvillim.
Kjo urë e kthen Bilçën në lagje të qytetit dhe për më tepër zgjeron paketën turistike të Beratit, ku vizitorët vetëm pak minuta larg do të gjejnë destinacionet e ekoturizmit. Ura me gjatësi prej 268 metra dhe gjerësi të superstrukturës 12.4 metra ku përfshihen dhe trotuare dhe korsi për biçikleta.
/k.s/r.e/a.f/
