PRISHTINË, 16 mars /ATSH/ Përfaqësuesi i Lartë i Bashkimit Evropian për Politikë të Jashtme, Josep Borrell ka deklaruar sot se takimi i 18 marsit në Ohër, ku do ta takojë kryeministrin e Kosovës, Albin Kurtin dhe presidentin serb, Aleksandar Vuçiç, do të bëhet për t’u pajtuar se si të zbatohet marrëveshja e propozuar nga BE.
Ai përmes një shkrimi në Twitter ka potencuar se, është koha që të përfundojë.
Kryeministri i Kosovës, Albin Kurti dhe presidenti i Serbisë, Aleksandar Vuçiç do të mbajnë takimin e radhës në kuadër të dialogut më 18 mars në Ohër.
Bashkimi Evropian ka informuar se Përfaqësuesi i Lartë i BE-së për politikë të Jashtme, Josep Borrell, së bashku me emisarin special të BE-së për dialogun, Miroslav Lajçak, nga ora 10:00 do të takohen ndaras me kryeministrin Albin Kurti dhe presidentin e Serbisë, Aleksandar Vuçiq. Pas takimeve ndaras, do të mbahet edhe një takim të përbashkët, i cili do të fokusohet në Propozimin e BE-së për normalizimin e marrëdhënieve ndërmjet Kosovës dhe Serbisë.
Më 27 shkurt, Kosova dhe Serbia janë pajtuar për përmbajtjen e Propozimit evropian, sipas zyrtarëve të Bashkimit Evropian./KosovaPress/
