TIRANË, 22 prill/ATSH/ Kompanitë indiane shprehin interes për të hyrë në tregun shqiptar.
Agjencia Shqiptare e Zhvillimit të Investimeve (AIDA), bëri të ditur se kompania indiane “Rajdhani”, ka shprehur interes për të vendosur kontakte bashkëpunimi me kompani shqiptare që importojnë grurë dhe produkte të tjera si: miell gruri, makarona, bishtaja të përpunuara etj.
Kompania “Rajdhani” operon në 20 vende të botës, e angazhuar në prodhimin, paketimin dhe tregtimin e gamës së gjerë të artikujve ushqimorë nën emrin e markës së saj. Kompania është e akredituar me certifikatën gjermane ISO 22000-2005, por dhe me certifikata të tjera nga organizatat e qeverisë së Indisë, si Autoriteti i Sigurisë dhe Standardeve Ushqimore të Indisë (FSSAI), AGMARK, APEDA.
Gjithashtu, kjo kompani është importuesi kryesor i drithërave nga Australia, Etiopia, Kanadaja, Mianmari dhe Kina.
/r.e/
