TIRANË, 17 mars/ATSH/ Kreu i grupit parlamentar dhe nënkryetari i Partisë Demokratike, Enkelejd Alibeaj takoi sot të Ngarkuarin e Posaçëm të Qeverisë Federale gjermane për Ballkanin Perëndimor, Manuel Sarrazin.
Alibeaj siguroi se “PD është e vendosur të shtyjë përpara procesin e integrimit”.
“I interesuar për çështjen e ecurisë së integrimit evropian të Shqipërisë e falënderova dhe e informova atë për qëndrimet e grupit parlamentar të Partisë Demokratike në këtë proces. Vendosmëria dhe mbështetja e PD-së për të shtyrë përpara këtë proces në interes të shqiptarëve do të vazhdojë e palëkundur, pavarësisht mungesës së përpjekjeve nga qeveria”, tha Alibeaj.
Sipas tij, “shpërhapja sistemike e korrupsionit financiar qeveritar i kulmuar në skandalin e impianteve të mbetjeve, korrupsioni politik në shitblerjen e votës në zgjedhje, abuzimi qeveritar me të dhënat personale, shpronësimi dhe dhunimi i banesave të qytetarëve pa asnjë shpërblim, kanë nevojë për më shumë prova reale të një sistemi drejtësie që godet duke zbatuar ligjin njësoj për të gjithë”.
/m.m/r.e/
