TIRANË, 18 shtator /ATSH/ Qytetarë u mblodhën sërish sot në sheshin “Skënderbej”, në protestën e 111-të kundër investimit turistik të planifikuar në zonën e Zvërnecit.
Pas grumbullimit në qendër të kryeqytetit, protestuesit marshuan përgjatë bulevardit “Dëshmorët e Kombit” drejt Kryeministrisë, duke kundërshtuar projektin dhe duke parashtruar edhe kërkesa lidhur me politikat për zonat e mbrojtura dhe investimet strategjike.
Edhe në protestën e sotme, një pjesë e mesazheve janë përcjellë përmes pankartave të mbajtura nga protestuesit. Në to kërkohet dorëheqja e kryeministrit Edi Rama dhe shprehet kundërshtimi ndaj qeverisë.
Në fjalën e mbajtur para Kryeministrisë, aktivisti Edison Lika, tha se reformat e ndërmarra nga PS kanë shërbyer vetëm për forcimin e pushtetit.
“Të gjitha reformat që ka bërë PS gjithë këto vite nuk kanë pasur në qendër qytetarin, por vetëm betonizimin e pushtetit. Ky regjim e ka betonizuar pushtetin me blerje votash, me vjedhje votash me korrupsion”, tha ai.
Pas fjalimeve të mbajtura para Kryeministrisë, qytetarët vijuan marshimin e përnatshëm përgjatë rrugëve kryesore të kryeqytetit.
/m.q/r.e/a.f/
