UASHINGTON, 23 nëntor /ATSH-DPA/ – Presidenti i sapozgjedhur i SHBA, Donald Trump emëroi investitorin Scott Bessent për të qenë sekretar i ri i Thesarit, sipas një postimt të Trump në platformën e tij të mediave sociale Truth.
Bessent, 62 vjeç, është themeluesi i fondit mbrojtës ”Key Square Group”.
Trump tha se Bessent duhet të trajtojë, ndër të tjera, çekuilibrat në tregtinë e jashtme dhe të fokusohet në rritjen ekonomike.
Trump gjithashtu dëshiron që ai të frenojë rritjen e borxhit kombëtar të SHBA-së, i cili u rrit nën presidencën e parë të Trump, ndërsa ai shtyu shkurtimet masive të taksave për amerikanët e pasur.
Sekretari i ardhshëm i Thesarit i SHBA-së do të duhet të gjejë një mënyrë për të zbatuar premtimet e fushatës së Trump, si ulja e taksave dhe tarifat e reja të importit.
Plani tarifor i Trump është kritikuar masivisht nga ekonomistët liberalë dhe konservatorë, të cilët thonë se do të çonte në çmime më të larta për konsumatorët amerikanë dhe do të rëndonte buxhetin e qeverisë.
Bessent i ka mbrojtur propozimet muajt e fundit.
Roli mbart gjithashtu përgjegjësinë e tregut financiar global, veçanërisht pasi Shtetet e Bashkuara kanë tregun më të madh të bonove qeveritare.
Howard Lutnick, një i besuar i Trump, kishte konkurruar gjithashtu për postin e sekretarit të Thesarit dhe u mbështet nga miliarderi teknologjik Elon Musk, ndër të tjera.
Sidoqoftë, Trump emëroi Lutnick për postin e sekretarit të Tregtisë./ a.jor.
