KIEV, 19 nëntor /ATSH-DPA/- Samiti i G20-ës në Rio de Zhaneiro nisi dje me një përparim të papritur pasi anëtarët lëshuan një deklaratë të përbashkët në ditën e parë të bisedimeve.
Brazili, si vendi pritës, formësoi me sukses axhendën, duke përfshirë prioritetet kryesore nga presidenca e tij e G20 në dokument, duke përfshirë luftën kundër urisë dhe ndryshimet klimatike, së bashku me përpjekjet për të reformuar organizatat ndërkombëtare.
Udhëheqësit nga ekonomitë kryesore të industrializuara dhe në zhvillim në botë shprehën gjithashtu angazhimin e tyre për taksimin më efektiv të super të pasurve dhe përsëritën objektivin e rënë dakord ndërkombëtarisht për kufizimin e ngrohjes globale në 1,5 gradë Celsius në krahasim me kohërat para-industriale.
Pavarësisht shqetësimeve fillestare mbi mosmarrëveshjet e mundshme nga presidenti ultra-liberal i Argjentinës Javier Milei, G20 arriti të sigurojë konsensus të gjerë.
Një pikë kyçe e marrëveshjes ishte shtytja për të reformuar Këshillin e Sigurimit të OKB-së, me deklaratën përfundimtare që bënte thirrje për një këshill më përfaqësues, gjithëpërfshirës, efikas, efektiv, demokratik dhe të përgjegjshëm.
Megjithatë, si samiti i vitit të kaluar në Indi, nuk pati asnjë dënim të qartë të agresionit të Rusisë në Ukrainë, ndryshe nga qëndrimi i fortë i mbajtur në samitin e Balit të vitit 2022. //A.I/
