TIRANË, 4 nëntor /ATSH/ Në kuadër të një vizite zyrtare në Francë, ministri i Mbrojtjes, Pirro Vengu, mori pjesë në panairin Euronaval, i cili i kushtohet industrisë luftarako-detare.
Gjatë kësaj vizite, Vengu bën me dije nëpërmjet një postimi në Facebook, se pati kënaqësinë të zhvillojë një bisedë dhe të shkëmbejë mendime me gjeneralin Thierry Carlier, drejtor ekzekutiv i Drejtorisë së Përgjithshme të Armatimit në Ministrinë e Ushtrisë së Francës.
“Biseduam për projekte potenciale në kuadër të bashkëpunimit institucional dhe ushtarak, përfshirë rivitalizimin e industrisë ushtarake në Shqipëri dhe mundësinë e përfshirjes së kompanive franceze në rritjen e kapaciteteve të Forcave të Armatosura Shqiptare”, njofton ministri i Mbrojtjes.
Më tej ministri nënvizoi se “ndërsa dinamikat globale të sigurisë evoluojnë, teknologjitë e avancuara detare po bëhen gjithnjë e më të rëndësishme”.
Si pjesë aktive e këtij zhvillimi, nënvizoi ministri Vengu, Shqipëria është e angazhuar për të inkurajuar inovacionin dhe investimet e huaja në fushën luftarako-detare.
/r.e/a.f/
