TIRANË, 22 tetor/ATSH/ Kolegji i Posaçëm i Apelimit, vendosi sot për lënien në fuqi të vendimit të Komisionit të Pavarur të Kualifikimit, për konfirmimin në detyrë të prokurores së Tiranës, Suela Salavaçi.
Vendimi u mor me shumicë votash nga trupi gjykues i Kolegjit, i kryesuar nga Albana Shtylla, me relatore Ina Rama dhe anëtarë, Sokol Çomo, Rezarta Schuetz e Mimoza Tasi. Prokurorja Suela Salavaçi u konfirmua nga Komisioni më 28 shtator 2023 me shumicë votash nga Komisioni i Pavarur i Kualifikimit, por ONM e dërgoi çështjen në KPA.
Në njoftimin e publikuar nga KPA sqarohet se; “Në përfundim të gjykimit, trupi gjykues, bazuar në nenin 66, pika 1, shkronja “a” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, me shumicë votash, vendosi: Lënien në fuqi të vendimit nr. 703, datë 28.09.2023, të Komisionit të Pavarur të Kualifikimit, që i përket subjektit të rivlerësimit Suela Salavaçi. Ky vendim është përfundimtar dhe ka efekt të menjëhershëm.”
/a.f/
