TEL AVIV, 19 qershor /ATSH-ANSA/ – Armët që iu kërkuan SHBA nga kryeministri Benjamin Netanyahu janë gati të dërgohen në Izrael.
Këtë e ka bërë të ditur vetë kreu i qeverisë izraelite në një postim në X, i informuar në lidhje me këtë nga ambasadori amerikan në Izrael, Jack Lew.
Dje, në një video të diskutueshme në rrjetet sociale, kryeministri Netanyahu e kishte cilësuar si ”të paimagjinueshme që SHBA të kishte frenuar dërgimin e armëve dhe municioneve në Izrael”, në një sulm të hapur ndaj Uashingtonit.
Pas këtyre deklaratave, Shtetet e Bashkuara anuluan një takim kyç me Izraelin.
Takimi duhet të ishte zhvilluar në Uashington dhe të kishte programin bërthamor të Iranit si fokus kryesor.
“Gjatë Luftës së Dytë Botërore, Churchill u tha Shteteve të Bashkuara ‘na jepni armatimin e duhur dhe ne do ta bëjmë punën. Dhe ne u themi atyre ‘na jepni edhe ne armatime dhe ne do ta kryejmë punën shumë më shpejt. Izraeli, aleati më i afërt i Amerikës po lufton për jetën e tij, po lufton kundër Iranit dhe armiqve tanë të tjerë të përbashkët”, nënvizoi Netanyahu./ /os/
