TIRANË, 14 maj/ATSH/ Rrëqebulli (Lynx lynx balcanicus), pas shumë kohësh është filmuar në Parkun Kombëtar Shebenik.
Lajmi u bë i ditur nga ministrja e Turizmit dhe Mjedisit, Mirela Kumbaro, e cila thekson se rrëqebulli u filmua nga stafi i Administratës së Zonave të Mbrojtura Elbasan.
“Pamjet e bukura që na dhurojnë kamerat kurth të zonave të mbrojtura. Pas shumë kohësh, Rrëqebulli i Ballkanit vjen i dokumentuar kaq bukur në Parkun Kombëtar Shebenik, të cilat monitorohen nga stafi i AdZM Elbasan dhe organizata AlbNatyra”, tha Kumbaro.
Rrëqebulli i Ballkanit është grabitqari i tretë më i madh në Evropë, rajonin e Ballkanit dhe në Shqipëri, pas ariut të murrmë dhe ujkut. Ai kërcënohet kryesisht nga gjuetia e paligjshme, prerja e pyjeve dhe degradimi, si dhe mungesa e gjahut.
Rrëqebulli banon në zonat pyjore në pjesën më të madhe të shtrirjes së tij. Ky nënlloj është i shtrirë në disa shtete të Gadishullit të Ballkanit, si Shqipëria, Kosova dhe Maqedonia e Veriut.
/k.s/
