TIRANË, 22 shkurt/ATSH/ Kryetari i bashkisë së Shkodrës, Benet Beci, theksoi në një postim se tri ditë-netët e festës së Karnavaleve të Shkodrës do të kenë protagonistë fëmijët e të rinjtë e qytetit.
“Të premten e të shtunën ata do të garojnë me krijimtarinë dhe imagjinatën e tyre. Një juri profesioniste do të vlerësojë më të mirët. Muzikë, bejte, maska e ngjyra e sigurisht edhe çmime për më të mirët”, ka shkruar kryebashkiaku Beci.
Bashkia Shkodër është gati për festën e shumëpritur. Fasada e saj është dekoruar me simbolin e festës, një maskë gjigante shumëngjyrëshe dhe me sloganin e këtij viti: “Rrugët e Shkodrës n’Karnaval”. Ndërkohë nëpër rrugë, të rinjtë e fëmijët kanë nisur të veshin maskat.
Ky aktivitet që do të zhvillohet nga 23-25 shkurt, do të implementohet përmes Fondit Shqiptar të Zhvillimit (FSHZH), i mbështetur nga Bashkimi Evropian (BE) – Banka Evropiane për Rindërtim dhe Zhvillim (BERZH), Ministria e Turizmit dhe Mjedisit dhe Ministria e Infrastrukturës dhe Energjisë.
/r.e/
