TIRANË, 21 shkurt/ ATSH/ Shefi i Shtabit të Përgjithshëm të Forcave të Armatosura, gjeneral major Arben Kingji është takuar të mërkurën me komandantin e Brigadës Shumëkombëshe për Evropën Juglindore (SEEBRIG), gjeneral brigade Bilbil Bitri.
Përmes një postimi në rrjetet sociale, gjeneral major Arben Kingji ka dhënë detaje nga takimi, ku në fokus ishte siguria rajonale.
“Në takimin me komandantin e Brigadës Shumëkombëshe për Evropën Juglindore (SEEBRIG), gjeneral brigade Bilbil Bitri, diskutuam mbi rëndësinë e kësaj nisme për mbrojtjen e sigurisë rajonale, nxitjen e marrëdhënies së fqinjësisë së mirë, si dhe angazhimin e Shqipërisë për rritjen e bashkëpunimit në operacionet e mbështetjes së paqes dhe operacionet humanitare midis vendeve pjesëmarrëse Shqipëria, Bullgaria, Greqia, Maqedonia e Veriut, Turqia dhe Rumania”, tha Kingji.
/r.e/
