Ministrja e Turizmit dhe Mjedisit, Mirela Kumbaro përmes një postimi në rrjetet sociale tha se, “2 shkurti i kushtohet Ligatinave, duke i dedikuar një ditë botërore që tregon se janë habitatet më të rëndësishme për gjallesat e shpendët, por edhe si thithëse të dioksidit të karbonit”.
Kumbaro publikoi pamje të mrekullueshme të ligatinave tona nga veriu në jug.
Agjencitë e Zonave të Mbrojtura në të gjithë vendin kanë ndërmarrë një sërë aktivitetesh, me fokus ndërgjegjësimin dhe njohjen e brezit të ri me ligatinat dhe rëndësinë e tyre për të ardhmen e njerëzimit.
Ligatinat janë një ekosistem mjaft i rëndësishëm që sigurojnë një larmi përfitimesh përfshirë filtrimin e ujit, sigurimin e biodiversitetit, mbrojtjen e bregdetit dhe zbutjen e ndryshimeve klimatike.
E ardhmja e njerëzimit varet nga ligatinat, megjithatë, gjysma e ligatinave në botë janë zhdukur gjatë shekullit të fundit.
Shumë pak vetë e dinë se në 3% sipërfaqe ligatinore në bregdet, përmblidhen 75% e vlerave të biodiversitetit.
2 Shkurti i çdo viti është Dita Botërore e Ligatinave. Kjo ditë shënon datën e miratimit të Konventës për Ligatinat në 2 Shkurt 1971 në qytetin Iranian të Ramsar-it.
