PRISHTINË, 18 janar/ATSH/- Presidentja e Kosovës, Vjosa Osmani, priti sot në takim të rregullt ambasadorin e SHBA-ve, Jeffrey Hovenier, me të cilin ka biseduar mbi zhvillimet e fundit në vend, dhe bashkëpunimin bilateral.
Në fokus të veçantë gjatë këtij takimi ishte miratimi i Programit të Shitjeve Ushtarake nga Departamenti i Shtetit të SHBA-ve për raketat antitank Javelin.
Me këtë rast, presidentja Osmani e falënderoi ambasadorin Hovenier për angazhimin e tij të vazhdueshëm dhe vlerësoi lartë punën e institucioneve në të dyja anët.
Në takim u diskutua edhe për një sërë çështje tjera të interesit të përbashkët dhe u ri-konfirmua nevoja dhe gatishmëria e bashkëpunimit dhe bashkërendimit të vazhdueshëm me qëllim të përmbushjes së objektivave të përbashkëta.
Departamenti i Shtetit ka marrë një vendim për miratimin e një shitje të mundshme ushtarake të huaj Kosovës të raketave Javelin dhe pajisjeve përkatëse për një kosto të vlerësuar prej 75 milionë dollarë.
Agjencia e Bashkëpunimit për Sigurinë e Mbrojtjes amerikane dorëzoi më 11 janar 2024 certifikatën e kërkuar duke njoftuar Kongresin për këtë shitje të mundshme. /KosovaPress/
