KAJRO, 1 nëntor /ATSH-DPA/ – Një grup prej 285 shtetasish të huaj dhe palestinezë me shtetësi të dyfishtë janë larguar nga Rripi i Gazës dhe kanë hyrë në Egjipt, tha sot Gjysmëhëna e Kuqe Egjiptiane.
Raed Abdel-Nasser, sekretari i përgjithshëm i Gjysmëhënës së Kuqe Egjiptiane në Sinain e Veriut, tha se grupi është pjesë e 525 personave që janë planifikuar të largohen sot nga Gaza përmes vendkalimit tokësor Rafah.
Kjo është hera e parë që nga fillimi i luftës midis Izraelit dhe Hamasit që një grup ndërkombëtar ka mundur të largohet nga territori palestinez i shkatërruar nga lufta.
Palestinezët e parë të plagosur u lejuan gjithashtu të largoheshin sot për të marrë trajtim.
Izraeli mbylli Rripin e Gazës dhe filloi të godasë territorin e dendur të populluar me sulme ajrore pasi luftëtarët e Hamasit kryen një sulm terrorist ndaj komuniteteve izraelite më 7 tetor që shkaktoi vdekjen e mbi 1 400 personave.
Ministria e Shëndetësisë e drejtuar nga Hamasi në Gaza tha se 8 796 banorë ishin vrarë në Gaza që nga fillimi i luftës dhe 22 219 ishin plagosur.
Që kur organizata militante islamike Hamas mori me dhunë kontrollin e Rripit të Gazës në vitin 2007, Izraeli ka shtrënguar masat për një bllokadë të zonës bregdetare, të mbështetur nga Egjipti.
Qeveria në Kajro është gjithashtu e shqetësuar se një numër i madh refugjatësh palestinezë mund të hyjnë në Egjipt nëpërmjet Rafahut. //a.i/
