TIRANË, 11 tetor/ATSH/ Këshilli i Ministrave rihapi garën për përzgjedhjen e kandidatit për anëtar të Bordit të Autoritetit të Mbikëqyrjes Financiare, që do të mbajë funksionin e drejtorit të Përgjithshëm Ekzekutiv, pas emërimit nga Kuvendi.
Gara u hap fillimisht më 20 shtator dhe afati për dorëzimin e aplikimeve ishte 29 shtatori.
Në njoftim përcaktohen dhe kriteret që duhet të përmbushin aplikantët.
Aplikanti duhet të jetë shtetas shqiptar; të ketë përfunduar studimet universitare në një nga këto fusha: ekonomi, juridik ose të lidhur me shkencën e aktuarëve; të ketë përvojë profesionale të paktën 7-vjeçare, nga e cila, të paktën, 5 vjet në njërën nga këto fusha ose në disa prej tyre të marra së bashku: financë-kontabilitet; administrim i shoqërive tregtare; këshillim ligjor i shoqërive tregtare; hartim legjislacioni; shkencë e aktuarëve; sigurime shoqërore dhe pensione.
Nuk mund të jetë anëtar i Bordit të Autoritetit të Mbikëqyrjes Financiare personi, i cili: në tri vitet e fundit ka qenë ortak, aksionar apo anëtar i organeve drejtuese të subjekteve të mbikëqyrura; ka lidhje familjare me ndonjë subjekt që është ortak, aksionar apo anëtar i organeve drejtuese të subjekteve të mbikëqyrura; në tri vitet e fundit ka qenë punonjës me kohë të pjesshme apo të plotë në subjektet e mbikëqyrura.
Afati i dorëzimit të aplikimit, është deri më 23 tetor 2023.
Më herët këtë post e mbante Ervin Mete, i cili u emërua ministër i Financave dhe Ekonomisë.
/r.e/
