TIRANË, 4 shtator/ATSH/ Shkolla 9-vjeçare “Ismail Klosi” në Ballsh ishte ndalesa e radhës e ministres së Arsimit dhe Sportit, Evis Kushi.
Gjatë inspektimit të punimeve që po bëhen për fillimin e vitit të ri shkollor, ministrja pa nga afër punimet në këtë shkollë, e cila më 11 shtator do të presë 490 nxënësit e saj.
Përmes një postimi në rrjete sociale, Kushi nënvizoi se shkolla është me të gjitha kushtet e nevojshme për një proces mësimor cilësor dhe gjithëpërfshirës.
“Edhe shkolla 9-vjeçare “Ismail Klosi” në Ballsh është gati të presë 490 nxënësit e saj këtë vit të ri shkollor me të gjitha kushtet e nevojshme për një proces mësimor cilësor dhe gjithëpërfshirës. Së bashku me deputetin Ismet Beqiraj dhe kryetarin e bashkisë Mallakastër, Qerim Ismailaj vizituam mjediset e kësaj shkolle, klasat, laboratorët, terrenet sportive”, tha Kushi.
Ministrja Kushi u shpreh se “u befasuam veçanërisht nga angazhimi i nxënësve dhe mësuesve në programin “Art, Zeje dhe Sport”, duke e kthyer shkollën në një qendër komunitare në shërbim të fëmijëve, të rinjve dhe të gjithë banorëve të zonës”.
/k.s/
