TIRANË, 19 gusht /ATSH/ Kryeministri Edi Rama i uroi sot ditëlindjen Presidentit të 42-të të Shteteve të Bashkuara të Amerikës, Bill Clinton.
Kreu i qeverisë ndau në rrjetet sociale një foto me Presidentin Clinton, i cili është duke mbajtur një fanellë të Kombëtares shqiptare të futbollit.
“Gëzuar ditëlindjen zoti President”, shkruan kryeministri Rama në gjuhën angleze.
Clinton vizitoi për herë të parë Shqipërinë në datat 3-4 korrik të këtij viti.
Në nder të tij u zhvillua në 3 korrik një ceremoni pritjeje në bulevardin “Dëshmorët e Kombit”, përballë Kryeministrisë në Tiranë ku ishin të pranishëm drejtuesit më të lartë të vendit, ministra, deputetë, njerëz të artit, kulturës, biznesit si dhe qytetarë të shumtë.
Clinton feston sot 77-vjetorin. Ai lindi më 19 gusht të vitit 1946 në Hope, Arkansas, SHBA.Clinton shërbeu si President 42-të i Shteteve të Bashkuara nga viti 1993 deri në vitin 2001.
Bill Clinton gjatë kohës së mandatit të tij si President i SHBA ndikoi në miratimin dhe realizimin e vendimeve të OKB-s për ndërhyrjen e NATO-s në Luftën e Kosovës në vitin 1999.
