TIRANË, 14 gusht /ATSH/ Kryetari i Partisë Demokratike, Lulzim Basha deklaroi sot se, “sado baltë të hedhë, Sali Berisha nuk e fsheh dot bashkëpunimin me Edi Ramën për kullat dhe as faktin se aty pastrohen para krimi dhe korrupsioni”.
Prandaj, shtoi Basha, “SPAK duhet të hetojë pa humbur kohë”.
“Pengjet fshihen sot pas kullës së Tiranës, pas “Malit të Korrupsionit” që po mban peng zhvillimin dhe mirëqenien e shqiptarëve”, shkroi Basha në një postim në rrjetet sociale.
“Rasti i kullës, e tregoi qartë para shqiptarëve se kush është pengu, por çfarë halli e shtyn Sali Berishën, që merr në mbrojtje çdo ditë simbolin e korrupsionit, jo vetëm në dosjen e Inceneratorëve? Sepse Dosja e Inceneratorëve është afera korruptive ku i gjithë pushteti i Edi Ramës, me dijeninë dhe bekimin e tij, është zhytur në korrupsion dhe abuzim me pushtetin”, theksoi ai.
“Kryeministri, ministra, dhe kryetarë bashkish kanë vepruar si një organizatë kriminale dhe SPAK duhet ta procedojë si të tillë pa përjashtuar askënd, duke filluar nga: Kryeministri, ministra, ish-ministra, kryetarin e Bashkisë së Tiranës e me radhë të gjithë ata që me paratë e shqiptarëve kanë ushqyer inceneratorët e korrupsionit”, u shpreh Basha.
“Kush amniston njërën palë apo tjetrën në përgjegjësinë ndaj inceneratorëve, qartas tregon bashkëpunimin që ka patur dhe vazhdon të ketë me ideatorët dhe zbatuesit e kësaj mega afere. Partia Demokratike do të vijojë të mbështesë çdo hetim të SPAK-ut për këto afera dhe e inkurajon atë të vijojë pa u ndalur nxjerrjen para drejtësisë të personave të tjera zyrtarë e ish-zyrtarë të përfshirë në afera korrupsioni që janë kallëzuar në prokurorinë e posaçme”, përfundoi Basha.
/r.e/
