TIRANË, 26 korrik/ ATSH/ Kreu i grupit të Rithemelimit në Partinë Demokratike, Sali Berisha ka komentuar Asamblenë Kombëtare të Partisë Socialiste.
Në një deklaratë për mediet, Berisha tha se asambleja e PS u mbyll me “viktimë” Damian Gjiknurin, teksa dosja e inceneratorëve po shpërbën këtë mazhorancë.
“Ajo çka mund të thuhet me siguri nga ky zhvillim 50-minutësh është se djegëset po përzhitin, po përcëllojnë me flakët e tyre, ndonëse nuk janë ndërtuar, mazhorancën”, deklaroi Berisha.
“U mblodh me dyer të mbyllura pasi prokuroria speciale, në një dosje 310 faqe, ka tronditur si një tërmet 8-ballësh, mafien më të rrezikshme të Europës. Ka tronditur sepse ka sjellë edhe njëherë në skenë për publikun shqiptar dhe ndërkombëtar, vjedhjen e shekullit dhe të gjithë organigramën e piramidës së vjedhjes së shekullit me në krye Edi Ramën. Ajo dosje që rëndom mund të quhet dosja ‘Ahmetaj’, në çdo rresht, në çdo fjalë, në çdo kuptim dhe çdo nënkuptim, është dosja Rama, dosja Agaçi, dosja Veliaj”, tha Berisha.
“Ndonëse viktima e fundit, Damiani, që u flak sot si Arben Ahmetaj, natyrisht me këshillën për t’u arratisur, dosja dhe flakët e saj kanë përcëlluar deputetë, ministra të tjerë e me radhë”, tha ai.
/r.e/
