TIRANË, 19 korrik /ATSH/ Grupi ndërinstitucional i punës për identifikimin dhe rikuperimin e personave të zhdukur gjatë të kaluarës komuniste u mblodh në mjediset e Prezencës së OSBE-së.
Përfaqësuesit e Prokurorisë së Përgjithshme, zyrës së Ministrit të Shtetit për Marrëdhëniet me Parlamentin, Autoritetit për Informimin mbi Dokumentet e ish-Sigurimit të Shtetit, Policisë së Shtetit, Institutit të Mjekësisë Ligjore dhe Komisionit Ndërkombëtar për Personat e Zhdukur vijuan diskutimet për projektvendimin e Këshillit të Ministrave, që përcakton rolet dhe përgjegjësitë e secilit institucion të përfshirë në proces.
Përmes lidhjes online, ata shkëmbyen përvoja me kolegë nga Ministria e Kroacisë për Çështjet e Veteranëve.
Drejtorja e Drejtorisë për Personat e Ndaluar dhe të Zhdukur në këtë ministri, Ivona Paltrinieri, e njohu grupin e punës me modelin kroat të zgjidhjes së çështjeve të identifikimit dhe rikuperimit të trupave të personave të zhdukur.
Takimi u mbështet nga Fondacioni “Konrad Adenauer”.
/r.e/
