TIRANË, 19 qershor/ATSH/ Delegacioni i Bashkimit Europian organizoi sot në Europe House, bisedë me gjimnazistët nga Lezha, pjesëmarrës aktivë te Qendra Rinore Hana.
“Të mahnitur nga energjia e këtyre studentëve të talentuar dhe kureshtarë. Diskutuam mbi politikat dhe programet e BE-së, të dedikuara ndaj rinisë, si Erasmus+, si dhe mundësi të tjera, ku ata mund të gjejnë veten e tyre”, u shpreh Delegacioni i BE-së në rrjetet sociale duke publikuar foto nga aktiviteti.
Gjatë takimit, sipas Delegacionit të BE-së, u shkëmbyen ide mbi rëndësinë e bashkëpunimit në nivel lokal, duke përfshirë fusha të tilla si turizmi, arti dhe kultura.
“Për më tepër, u fokusuam në sfidat e Shqipërisë drejt anëtarësimit në Bashkimin Evropian dhe nevojën për të punuar së bashku për ndërtimin e një Shqipërie evropiane”, thuhet në njoftim.
/r.e/
