TIRANË, 30 maj/ATSH/ Të rinjtë dhe fëmijët e qytetit të Lushnjës do të kenë tashmë një bibliotekë të re.
Drejtuesi politik i Partisë Socialiste në qarkun e Fierit, Taulant Balla dhe kryetarja e bashkisë së Lushnjës, Eriselda Sefa panë nga afër punën për rikonstruksionin e godinës së bibliotekës së qytetit.
Kryebashkiakja Sefa tha se, “falë kësaj ndërhyrje do të kemi një bibliotekë me pamje moderne, pasi duam të afrojmë sa më shumë të rinj”.
“Pjesë e bibliotekës do të jetë edhe një kënd i teknologjisë së informacionit, pasi të rinjtë duan të lexojnë edhe libra online”, tha Sefa.
Balla tha se, “rikonstruksioni i bibliotekës është një premtim i mbajtur. Ka 40 vite që nuk është ndërhyrë në bibliotekën e qytetit”.
Rikonstruksioni i bibliotekës po realizohet me mbështetjen e Agjencisë Kombëtare të Rinisë (AKR), në kuadër të projektit “Të rinjtë për të rinjtë”.
Biblioteka do të transformohet në një ambient argëtimi dhe edukimi jo vetëm për të rinjtë, por edhe për fëmijët. Ajo është konceptuar edhe si hapësirë multifunkisonale, ku të rinjtë angazhohen në trajnime dhe bashkëbisedime të ndryshme.
/k.s/ /gj.m/r.e/
