TIRANË, 29 maj/ATSH/ Komisioni i Ankimimeve dhe Sanksioneve shqyrtoi sot kërkesën ankimore të depozituar nga Partia Aleanca Progresiste LZHK që kundërshton rezultatin zgjedhor në Kurbin.
Subjekti Partia Aleanca Progresiste LZHK kishte kërkuar hapjen e një kutie të deklaruar nga KZAZ si të parregullt, numërimin e votave në këtë kuti dhe pasqyrimin e tyre në tabelën përmbledhëse të rezultateve.
KAS nga këqyrja e materialit zgjedhor konstatoi se kutia ishte masivisht e dëmtuar dhe për këtë arsye vendosi rrëzimin e kërkesës së subjektit dhe lënien në fuqi të vendimit të KZAZ.
Gjithashtu, KAS shqyrtoi kërkesën ankimore të depozituar nga Partia Aleanca Demokristiane, e cila kundërshton rezultatin zgjedhor për këshillin bashkiak Kamzë. Në ankesë kërkohet rivlerësim i votave të vlefshme dhe të pavlefshme për disa subjekte në disa prej kutive të votimit për këshillin bashkiak, Kamzë.
KAS vendosi rrëzimin e kërkesës ankimore, pasi pala ankuese nuk ka plotësuar elementët e formës dhe të përmbajtjes së kërkesës ankimore sipas afatit të lënë më parë nga KAS.
/m.m/r.e/
